Gallestoff og ballestoff

TESTOSTERON Det er kjekt at professor John E. Berg gir meg rett i at det ikkje er testosteronet som får menn til å gå av skaftet (Morgenbladet 27. juni). Kan henda er me heller ikkje heilt usamde når det gjeld kolesterol. At kolesteroldempande medikament kan øydeleggja den naturlege testosteronproduksjonen, er i alle fall ikkje til hinder for ein samanheng mellom kolesteroloverskot og aggressiv atferd, slik det er påvist av forskarane Redford Williams og Ilene C. Siegler.

Kolesterol er ei avleiing av det greske ‘khole’, som tyder galle. Den medisinske interessa for kolesterol har i hovudsak vore konsentrert om førebyggjing av hjarte- og karsjukdommar. Men gallestoffet er òg knytta til det sinnelaget som i gamle dagar blei kalla kolerisk.

I vår tid er det vanleg å oppfatta all djervskap som testosteronstyrt. Mens uredde personar langt ut på 1900-talet hadde mot i brystet, har det no sige ned i ballane, og modige kvinner må påførast metaforiske ballar for å framstå som sannsynlege. Når fotballhooligans og militante islamistar ser på seg sjølve som ekte mannfolk, er det likevel ikkje sikkert at det tilsvarer den reelle mengda av faktisk ballestoff. Om gallen har gått til hovudet på dei, eller det handlar om heilt andre drivkrefter, er det opp til vitskapen finna ut av, og opp til Morgenbladet å formidla på etterretteleg vis.

Solveig Aareskjold

Forfattar